#Литература_Башкортостана #Башҡортостан_әҙәбиәте
00:25 14.11.2023 16+
Бөгөн танылған яҙыусы, тәржемәсе, журналист, Башҡортостан Республикаһының атҡаҙанған мәҙәниәт хеҙмәткәре, Мифтахетдин Аҡмулла һәм Һәҙиә Дәүләтшина исемендәге әҙәби премиялар лауреаты, Рәсәйҙең һәм Башҡортостандың Журналистар союзы ағзаһы, Рәсәйҙең һәм Башҡортостандың Яҙыусылар союзы ағзаһы Факил Сәлих улы Мырҙаҡаев тыуған көнөн билдәләй! Абруйлы ҡәләмдәшебеҙҙе ғүмер байрамы менән ихлас ҡотлайбыҙ һәм Ағиҙел йылғаһылай оҙон ғүмер, ҡоростай ныҡлы һаулыҡ-сәләмәтлек, аҡ бәхеттәр, именлек, артабан да башҡорт әҙәбиәте һәм матбуғаты мәнфәғәтендә емешле ижад теләп ҡалабыҙ!
Мырҙаҡаев Факил Сәлих улы 1950 йылдың 14 ноябрендә БАССР‑ҙың Миәкә районы Ҡаран-Ҡуңҡаҫ ауылында тыуған. Урта мәктәпте тамамлағандан һуң БДУ‑ға уҡырға ингән, уны 1983 йылда тамамлаған. 1971 йылдан алып «Октябрь» гәзитендә эшләгән. 1975 йылдан «Совет Башҡортостаны» гәзитендә эшләй башлай. 1985 йылдан алып унда бүлек мөдире. 1986 йылдан «Башҡортостан ҡыҙы» журналының яуаплы секретары. 1996 йылда яңынан «Башҡортостан» гәзитенә эшкә бара. 2011 йылдан «Һәнәк» журналының баш мөхәррир урынбаҫары вазифаһын башҡара.
«Ҡамғаҡ» (1996), «Аҙашҡан болан балаһы» (2000), «Яҙмыш фалы — йәшлектә» (2007), «Яратам, тигәйнең» (2010), «Ҡайын һуты» (2015) һ. б. китаптарына ингән повесть һәм хикәйәләр авторы. "Урыҫса‑башҡортса ауыл хужалығы терминдары һүҙлеге"нең («Русско‑башкирский словарь сель‑ скохозяйственных терминов») автор-төҙөүсеһе (1987); 2001 йылда — 2‑се тулыландырылған баҫмаһы.
«Мостай Кәрим афоризмдары — Афоризмы Мустая Карима» китабының автор-төҙөүсеһе (2014).
Әҫәрҙәре урыҫ, татар телдәренә тәржемә ителгән. С. Т. Айытматов, М. М. Ахмадов, В. В. Быков, В. Н. Ганичев, Т. Й. Ғиниәтуллин, Ю. С. Рытхэу, В. М. Шукшин һ.б. әҫәрҙәрен башҡорт теленә тәржемә итә.
Оставить сообщение: